Հայկական հնչողությամբ ազգանուն ունեցողները խտրականության են ենթարկվում Ադրբեջան այցելելիս. Պետդեպ

ԱՄՆ Պետդեպարտամենտը հրապարակել է 2018 թ.-ի Մարդու իրավունքների մասին զեկույցը, որում անդրադարձ է արվել Ադրբեջանում մարդու իրավունքների ոտնահարմանը: Պետդեպը նկատել է, որ Ադրբեջան այցելելիս ազգային հողի վրա խտրականության են ենթարկվում նաև այն մարդիկ, ովքեր հայկական կամ էլ հայկականի հնչողությամբ ազգանուն են կրում: Նրանց արգելում են մուտք գործել Ադրբեջանՙ առանց հաշվի առնելու, թե այդ անձինք որ երկրի քաղաքացիներն են: Պաշտոնական Մոսկվան բազմիցս բարձրաձայնել է այս խնդրի մասին, նոտաներ է հղել, սակայն ապարդյուն: Ադրբեջանական կողմը պատճառաբանում է, թե այդ մարդկանց երկիր թողնելու դեպքում չի կարողանալու ապահովել նրանց անվտանգությունը։ Նույնիսկ պատահել է, երբ Ադրբեջանի սահմանապահները խնդիրներ են ստեղծել մի ուկրաինացի լրագրողի համար, որը եկել էր հենց իրենց պետական քարոզչական գիծը տանելու։ Երբ սահմանապահները կարդացել էին լրագրողի անունը՝ Նատասյա Նագորնա, հարցրել էին, թե ինչու է նա կրում հայկական ազգանուն ու բարդություններ էին ստեղծել նրա համար։ Լուսանկարըՙ Էմիլ Սանամյանի թվիթերյան էջի: