Երբ հայտնի կլինի Ամուլսարի հարցով կառավարության որոշումը. Ավինյան

Նոր փորձաքննություն է իրականացվելու՝ օդում կախված բոլոր հարցերի պատասխաններն ստանալու համար: Այսօր ԱԺ-ում փոխվարչապետ Տիգրան Ավինյանը լրագրողների հետ զրույցում անդրադարձավ Ամուլսարի հանքավայրի շահագործմամբ զբաղվող Լիդիան Արմենիա ընկերության հայտարարություններին: Նրա խոսքով՝ որևէ խտրական վերաբերմունք կառավարությունը չի ցուցաբերում որևէ տնտեսվարողի նկատմամբ: Հարցը վերաբերում է տվյալ դեպքում բնապահպանական ռիսկերին: «Եթե տեսնենք, որ կան ռիսկեր, որոնք վերահսկելի չեն, ըստ այդմ մեր որոշումները կկայացնենք»,- ասաց նա: Ըստ Ավինյանի՝ այս առումով վերջնաժամկետ է սահմանված մայիս ամիսը: Հարցին, թե այդ ընթացքում Լիդիան Արմենիան չի՞ դիմի արբիտրաժային դատարան, Ավինյանը պատասխանեց, որ նրանք մեկ հայտարարության մեջ խոսում էին երեք ամսվա ընթացքում դիմելու մասին, մյուս հայտարարության մեջ՝ վեց ամսում: «Համենայնդեպս, մենք այդ ժամկետում մեր հասարակության համար բոլոր պատասխանները կստանանք: Եթե այդ պատասխանները լինեն ի օգուտ Լիդիան ընկերության, դատարան դիմելու նպատակ էլ չի ունենա ընկերությունը: Եթե հակառակը արձանագրվի, ինձ թվում է՝ իմաստ չի ունենա դատարան դիմելը»,- ասաց նա: Հարցին, թե ՀՀ կառավարությունը գնահատե՞լ է, թե արբիտրաժային դատարան դիմելու դեպքում հնարավոր ինչ վնասներ կարող են լինել, փոխվարչապետը պատասխանեց. «Մենք բոլոր ռիսկերից քաջատեղյակ ենք և վախենալու որևէ բան չունենք»: Հիշեցնենք, որ ընկերությունը ՀՀ կառավարությանը նախազգուշացրել է արբիտրաժային դատարան դիմելու մասին: