Հարցաքննվել է Կադաստրի նախկին պետը

Մեղրու ազատ տնտեսական գոտու շուրջ գտնվող հողերի գործով օրերս հարցաքննվել է Անշարժ գույքի կադաստրի նախկին պետ Մարտին Սարգսյանը։ Այս մասին այսօր հայտնում է ArmDaily. am-ը։ Լրատվականին հաջողվել է ճշտել, որ նա առայժմ վկայի կարգավիճակ ունի։ Գործի շրջանակներում մեղադրանք է առաջադրվել Կարճևան համայնքի նախկին ղեկավարին, ով անձնական այլ դրդումներով՝ հետագայում ավելի թանկ գնով վաճառելու և օգուտներ ունենալու նպատակով, խախտելով «Հրապարակային սակարկությունների մասին» ՀՀ օրենքի և ՀՀ Կառավարության 12.04.2001 թվականի թիվ 286 որոշման պահանջները, առանց աճուրդ կազմակերպելու, կազմել է դրա ընթացքի և արդյունքների վերաբերյալ կեղծ պաշտոնական փաստաթղթեր, որոնց հիմքով 0.44672 հա, 0.29718 հա և 0.63508 հա մակերեսով հողատարածքները օտարել է իրականում իր շահերը ներկայացնող աներորդուն: Կառավարության մարտի 7-ի նիստին վարչապետ Նիկոլ Փաշինյանն եւս անդրադարձել է այս հողերի շուրջ ստեղծված իրավիճակին: «Նախնական տեղեկություններ ունեինք, որ բարձրաստիճան պաշտոնյաներ, նախապես տեղյակ լինելով, որ այնտեղ ազատ տնտեսական գոտի է հիմնադրվելու, շրջակա հողերը ձեռք էին բերել ծիծաղելի գներով: Եվ երբ ես անցյալ տարի այցելեցի «Մեղրի» ազատ տնտեսական գոտի, արձանագրվեց, որ այնտեղ, ըստ էության, պետական հողատարածք չկա»,- ասել է վարչապետը: