Ռուսական կողմից չկա վերաբերմունք Ռոբերտ Քոչարյանի նկատմամբ. Ալեն Սիմոնյան

Ինչպես Հայաստանը չի խառնվում որևէ երկրի ներքին գործերին, այնպես էլ որևէ այլ երկիր չպետք է խառնվի մեր ներքին գործերին. այս մասին լրագրողների հետ զրույցում ասաց Ազգային ժողովի փոխնախագահ Ալեն Սիմոնյանը՝ պատասխանելով հարցին, թե ինչպես է վերաբերվում վարչապետի հայտարարությանը, որով վերջինս ՀՀ-ում գործող ռուսական որոշ լրատվամիջոցների կոչ էր արել կոռեկտ լինել «Մարտի 1–ի» գործի շրջանակներում ՀՀ երկրորդ նախագահ Ռոբերտ Քոչարյանի նկատմամբ իրականացվող քրեական հետապնդման գործընթացը լուսաբանելիս: Լրագրողների հարցին, թե արդյոք չի տեսնում «ՌԴ կողմից սատարում» Ռոբերտ Քոչարյանի նկատմամբ, Ալեն Սիմոնյանը պատասխանեց․ «Չեմ կարծում, որ «ՌԴ կողմից սատարում» արտահայտությունը ճիշտ է: Դրանք ՀՀ ներքին գործերն են, և ինչպես մենք չենք խառնվում որևիցե երկրի ներքին գործերին, այնպես էլ որևիցե այլ երկիր չպետք է խառնվի ՀՀ ներքին գործերին: Կարծում եմ՝ այդ ուղերձը բազմիցս հղվել է, և հետևությունները մեր գործընկերները կանեն»: Ալեն Սիմոնյանը նաևի նշեց, որ մասնավոր զրույցների ժամանակ կարող է վստահեցնել, որ, ընդհանուր առմամբ ռուսական կողմից չկա Ռոբերտ Քոչարյանի նկատմամբ սատարում։