Արթուր Վանեցյանին կոչ կանեմ այս թեմայով չխոսել. Դավիթ Սանասարյանը` իր գործի մասին

«Երբ մենք պետք է սկսեինք ուսումնասիրությունը, ինձ զզուշացրեցին, որ մտնում ենք մի դաշտ, որտեղ լուրջ հակահարձակում է լինում` նախկին օլիգարխների դաշտն ենք մտնում: Ես ասացի, որ ինձ չի հետաքրքրում, թե ում դաշտն ենք մտնում, քանի որ ես ուզում եմ օրինականությունը վերականգնել»: Այս մասին այսօրվա ասուլիսում հայտարարեց Պետական վերահսկողական ծառայության պետի պաշտոնը զբաղեցրած Դավիթ Սանասարյանը: «Փորձում եմ հասկանալ՝ ինչ ջրեր են հոսում, ինչի համար է դա արվում: Ունեմ հիմնավոր կասկածներ, որոնց մասին չեմ հայտնի դեռ: Ես էլ կորած մարդ չեմ, ինձ էլ շատ ինֆորմացիաներ են հասնում և վերլուծում եմ, որ տեսնեմ, թե որտեղից են գալիս այս քամիները»,-ասաց նա: Անդրադառնալով իր և ԱԱԾ տնօրենի հարաբերություններին, Դավիթ Սանասարյանն ասաց. «Իմ և պարոն Վանեցյանի հարաբերությունները պետք է ոչ մի կերպ կապ չունենան այս գործի հետ: Պարոն Վանեցյանը քննչական մարմնի վերադասը չի համարվում և առհասարակ, իրեն էլ կոչ կանեմ, որ այս թեմայով չխոսի»,-ասաց Սանասարյանը և նշեց, որ Վանեցյանի հետ ունեցել են աշխատանքային հարաբերություններ, և որևէ խնդիր չի եղել: «Բայց կոչը հստակ է, որ չխառնվեն մարդիկ, ովքեր իրավասու չեն խառնվելու, քանի որ դա դիտարկվելու է որպես ճնշում: Արթուր Վանեցյանն ասում է, որ դատարանում կտեսնենք: Չի կարելի նման բան ասել, քանի որ գործը կարող է դատարան չգնալ»,-ասաց նա: