ՈւՂԻՂ. Բողոքի ցույց` Կենդանաբանական այգու դիմաց

Երևանի կենդանաբանական այգու սեզոնի բացմանը զուգընթաց այգու դիմաց ներկա և նախկին աշխատակիցները իրականացնում են բողոքի ակցիա՝ այգու տնօրեն Ռուբեն Խաչատրյանի հրաժարականի պահանջով: Կենդանաբանական այգու նախկին աշխատակիցները պահանջում են Երևանի կենդանաբանական այգու տնօրեն Ռուբեն Խաչատրյանի ու նրա մի քանի աշխատակիցների հրաժարականը։ Ռուբեն Խաչատրյանի հրաժարականի պահանջը աշխատակիցները մեկնաբանում են այն մտահոգությամբ, որ 2011թ-ին տնօրեն նշանակվելուց ի վեր Խաչատրյանը այգին տանում է կործանման՝ այս ընթացքում մեծացել է կենդանիների անկման թիվը: Բողոքի ակցիայի մասնակիցները պահանջում են կառավարման խորհուրդ ստեղծել և անցկացնել տնօրենի ընտրություններ, հնարավորություն տալ մասնագետներին, կենդանասերներին ներկայացնել իրենց տեսլականը։ Նրանք նաև պահանջում են ստեղծել հանձնաժողով, որտեղ ներկայացուցիչներ կլինեն նաև քաղաքապետարանից, ինչպես նաև մասնագետներ, որոնք կքննարկեն այգու զարգացմանն ուղղված հարցերը: Այդ առաջարկությունները ներկայացրել են նաև քաղաքապետարանում: Հիշեցնենք, որ կենդանաբանական այգու տնօրեն Ռուբեն Խաչատրյանն էլ, խոսելով իր դեմ ուղղված մեղադրանքների մասին, նշել էր, որ իրեն զրպարտում են: Ինչ վերաբերում է անարդյունավետ կառավարման մեղադրանքներին, Խաչատրյան ասել էր, որ ինքը բնապահպանական կրթություն է ստացել Ժնևի համալսարանում՝ քչերն ունեն այդպիսի կրթություն, իսկ արդյունքը 7 տարվա գործով է ցույց տվել: Տեսանյութը` Aysor am-ի: