Մարտիմեկյան օրերին 50 հազարականներ բաժանվել են, բայց Քոչարյանը տեղյակ չի եղել. Պաշտպան

ԱԺ-ում Պետաիրավական հարցերով խորհրդարանական մշտական հանձնաժողովի նիստից հետո լրագրողների հետ զրույցում գլխավոր դատախազ Արթուր Դավթյանը չի ժխտել, որ իշխանափոխությունը մեծ դեր է ունեցել Մարտի 1-ի գործի վերաբացման հետ. իշխանափոխությունից հետո մարդիկ սկսել են համագործակցել իրավապահ մարմինների հետ և անկաշկանդ տեղեկություններ հաղորդել։ Գլխավոր դատախազը նշել է, որ Մարտի մեկի գործի դատավարության գրեթե ամբողջ ընթացքը հանրությունը կտեսնի և կտա իր գնահատականները։ "Բացառիկ, աննախադեպ դատավարություն է լինելու, դուք կտեսնեք Երրորդ Հանրապետության ժամանակվա նվազագույնը 3 նախագահներին տարբեր դատավարական կարգավիճակով, կտեսնեք բազմաթիվ հասարակական, քաղաքական գործիչների, նախկին ու ներկա պաշտոնատար անձանց",-ասաց Դավթյանը։ Հարցին՝ ամբողջ դատավարությունը դռնբա՞ց է լինելու, թե՞ ոչ, Արթուր Դավթյանը պատասխանեց, որ կլինեն փոքր հատվածներ, որոնք դռնփակ կանցկացվեն, բայց, որպես կանոն, հրապարակային կլսենք մարդկանց ցուցմունքները։ Նշենք, որ երեկ Մարտի 1-ի գործով տուժողի ներկայացուցիչ Սեդա Սաֆարյանը factor. am-ի հետ զրույցում բացահայտումներ էր ներկայացրել գործից, մասնավորապես, հայտարարելով, որ օլիգարխները 50 հազարական դրամ են բաժանել մարտիմեկյան դեպքերի մասնակից զինվորականներին: Մարտի 1-ի գործից անջատված մասով ի հայտ եկած բացահայտումների առնչությամբ Aravot. am-ի հետ զրույցում Ռոբերտ Քոչարյանի պաշտպան Ռուբեն Սահակյանը նշել է, թե ինչ, որ կա գործում՝ կա, բայց գնահատականը կտան դատարանում: Ինչ վերաբերում է բաժանված 50 հազարական դրամներին, ապա Սահակյանը հաստատել է, որ, այո, գումարները բաժանվել են, բայց Քոչարյանն առնչություն չունի այդ գումարների բաշխման հետ` "Այդքան բան": Լրատվամիջոցի հարցին, այսինքն հերքո՞ւմ եք, որ նաեւ պետական մակարդակով են գումարները բաշխվել, պարոն Սահակյանն ասել է. "Արդեն պատասխանեցի: Քոչարյանն առնչություն չունի, իսկ եթե չունի, արդեն մնացած հարցերը մեզ չեն հետաքրքրում": Իսկ այն հարցին, թե գործում ի հայտ եկած նոր հանգամանքները ձեր պաշտպանյալի դեմ չե՞ն, նրա մեղավորությունն ու մասնակցությունը ապացուցող հանգամանք չե՞ն, փաստաբանը պատասխանեց` "Իհարկե, ոչ":