Բնապահպանության նախարարը դատի կտա «Ջամբո»-ի հիմնադրին

Բնապահպանության նախարար Էրիկ Գրիգորյանը պատրաստվում է դատի տալ «Ջամբո» էկզոտիկ պարկի հիմնադիր Արտյոմ Վարդանյանին: Իր ֆեյսբուքյան էջում նախարարը գրել է. «Հարգելի գործընկերներ, երեկ զանգվածային լրատվության միջոցներով տարածում է ստացել «Ջամբո» էկզոտիկ պարկի հիմնադիր Արտյոմ Վարդանյանի հրապարակային արտահայտությունը, որ «Կենդանաբանական այգու տնօրենին հովանավորում է բնապահպանության նախարարը, միասին բիզնես ունեն»: Սույն հայտարարությունը որևէ աղերս չունի իրականության հետ։ Ինքս միշտ հանդրուժողաբար եմ վերաբերվել և վերաբերվում քննադատությանը՝ գիտակցելով խոսքի ազատության կարևորությունը: Սակայն նշված անձի արտահայտությունը ո՛չ քննադատություն է, ո՛չ էլ գնահատողական դատողություն, այլ զրպարտություն, որով փորձ է արվել արատավորել իմ գործունեությունն ու համբավը։ Այդ իսկ պատճառով որոշել եմ օրենքով սահմանված կարգով դիմել դատարան հրապարակայնորեն հերքման և պատճառված վնասի փոխհատուցման պահանջներով: Առաջիկայում նշված հարցի վերաբերյալ մանրամասները կհայտնեն իմ շահերը պաշտպանող փաստաբանները: Այլևս չեմ պատրաստվում հանդուրժել սուտը, կեղծ լուրերն ու զրպարտությունները։ Ուզում եմ տեղեկացնել, որ այսուհետ նմանատիպ յուրաքանչյուր դրսևորում ստանալու է իր պատասխանը` իրավական տիրույթում»։ Նշենք, որ երեկ Կենդանաբանական այգու սեզոնի բացման ժամանակ բողոքի ակցիայի ընթացքում Արտյոմ Վարդանյանը, որը իր մասնավոր տարածքում կենդանիներ է պահում, պահանջում էր այգու տնօրեն Ռուբեն Խաչատրյանի հրաժարականը: