Գագիկ Ծառուկյանի կողմից հանցագործության մասին ՔՈ–ի հաղորդումը ուղարկվել է ՀՔԾ. Արթուր Դավթյան

Ազգային ժողովի «Բարգավաճ Հայաստան» խմբակցության ղեկավար Գագիկ Ծառուկյանի կողմից հանցագործության մասին՝ «Քաղաքացու որոշում» կուսակցության հաղորդումն ուղարկել ենք Հատուկ քննչական ծառայություն։ Այս մասին լրագրողների հետ զրույցում ասաց Գլխավոր դատախազ Արթուր Դավթյանը։ «Քրեադատավարական օրենսգրքով նախատեսված հաղորդում է ներկայացվել հանցագործության մասին։ Քրեական դատավարության օրենսգիրքը նախատեսում է հաղորդումների քննարկման ընթացակարգ։ Ղեկավարվելով այս ընթացակարգով եւ այդ հաղորդումն ուղարկել ենք ՀՔԾ, հանձնարարվել է ՀՔԾ–ին քր. դատ. օրենսգրքի 180–րդ հոդվածով նախատեսված ընթացակարգերը ձեռնարկել, ստուգողական գործողություններ կկատարվեն եւ դրա հիման վրա նախաքննական մարմինը պարտավոր է լինելու տալ իրավական գնահատական»,–ասաց նա։ Հարցին՝ Գլխավոր դատախազի կարծիքով՝ Գագիկ Ծառուկյանի կողմից խախտվել է պատգամավորի նկատմամբ սահմանված պահանջը, նա հրաժարվեց պատասխանել. «Եթե ես նախապես իմ կարծիքը հրապարակեմ, ես կկաշկանդեմ 10-օրյա ժամկետում նյութեր նախապատրաստող պաշտոնատար անձին եւ իր գործողությունները։ Կտրվի քրեաիրավական գնահատական, եթե ես այլ դիրքորոշում ունենամ, կհայտնեմ այդ մասին»։ Հիշեցնենք, որ «Քաղաքացու որոշում» սոցիալ-դեմոկրատական կուսակցությունը դիմում է ներկայացրել ԱԺ նախագահ Արարատ Միրզոյանին եւ ՀՀ Գլխավոր դատախազ Արթուր Դավթյանին՝ սույն թվականի ապրիլի 19-ին «Պետական տուրքի մասին ՀՀ օրենքում լրացումներ կատարելու մասին» օրենքի նախագծի քննարկման ժամանակ ԱԺ նիստերի դահլիճում եւ դրանից դուրս լրագրողների հետ շփումներում Գագիկ Ծառուկյանի հնչեցրած հայտարարությունների հետ կապված քրեական հետապնդում հարուցելու եւ պատգամավորական մանդատից զրկելու գործընթաց սկսելու հարցով՝ հաշվի առնելով պատգամավորի ձեռնարկատիրական գործունեությամբ զբաղվելու արգելքը: