Բաքվում բանտարկված հայ երիտասարդը տեղափոխվել է Ռուսաստան

Բաքվում շուրջ երեք տարի բանտում անցկացրած Մարատ Ուելդանով Գալուստյանին տեղափոխել են Ռուսաստան, և նա գտնվում է Մախաչկալայի քննչական մեկուսարանում: Եղբոր տեղափոխության մասին իր ֆեյսբուքյան էջում հայտնել է քույրը՝ Մարիանա Միրզոյանը՝ շնորհակալություն է հայտնել իր պայքարին աջակցած անձանց, այդ թվում՝ Ռուսաստանում հայերի միության նախագահ Արա Աբրահամյանին: Ինչպես գրում է ռուսական և իսրայելական ծագում ունեցող բլոգեր Ալեքսանդր Լապշինը, «Բաքուն երեք տարի ձգձգում էր արտահանձնման հարցը՝ հավանաբար դրա դիմաց որոշ շահութամաս շորթելով Ռուսաստանից»: «Գրեթե նույն կերպ Լուկաշենկոն փորձում էր ինձ Բաքվին արտահանձնելու դիմաց գազի վճարումների համար ժամանակ շահել: Այդուհանդերձ, Մարատին փոխանցել են ռուսական կողմին: Նրան այնուհետև կտեղափոխեն Կրասնոդար, և հուսով եմ, որ Ռուսաստանի իշխանությունները ազատ կարձակեն նրան համաներման կամ պայմանական վաղաժամկետ ազատման սկզբունքով»,- գրել է բլոգերը: Հիշեցնենք, որ Մարատ Ուելդանով-Գալուստյանը 2016թ․ հունիսի 9-ին ձերբակալվել և անազատության մեջ է պահվել Բաքվում՝ թմրանյութերի, հոգեմետ միջոցների անօրինական պատրաստման, արտադրության, ձեռքբերման, իրացման, պահման և տարածման մեղադրանքներով: 2017թ. ապրիլի 28-ին Բաքվում ավարտվել է Մարատ Ուելդանով-Գալուստյանի գործի քննությունը: Փակ դատավարությունն անցկացվել էր դատավոր Սամիր Ալիևի նախագահությամբ: Ազգությամբ հայ ՌԴ քաղաքացին դատապարտվել է 8 տարվա ազատազրկման: