Արծարծվում է իմ աշխատավարձի չափը․ Հակոբ Կարապետյան

Քաղաքապետարանի աշխատակազմի աշխատավարձերի բարձրացման նախագծի քննարկումների համատեքստում արծարծվում է նաև քաղաքապետի մամուլի խոսնակի, այսինքն` ներկա պահին՝ իմ աշխատավարձի չափը: Այս մասին իր ֆեյսբուքյան էջում գրառում է կատարել Երևանի քաղաքապետ Հայկ Մարությանի մամուլի քարտուղար Հակոբ Կարապետյանը: Նրա խոսքով` սեփական եկամուտները հրապարակավ քննարկելն ամենահաճելի զբաղմունքը չէ, ամեն դեպքում, հանրային ծառայության բերումով որոշել է որոշ պարզաբանումներ ներկայացնել իր եկամուտների վերաբերյալ: «Ավագանու հաստատմանը ներկայացված նախագծի համաձայն` իմ աշխատավարձը կհավասարեցվի վարչության պետի աշխատավարձին և, հարկերը հանած, կկազմի մոտ 450 հազար դրամ: Մինչև քաղաքապետարան գալս, որպես ազատ (freelance) լրագրող, սցենարիստ ու խմբագիր աշխատում էի մի քանի կազմակերպությունների հետ, և ամսական եկամուտս տատանվում էր 500-700 հազարի միջակայքում: Համապատասխանաբար, ամսական մոտ 250 հազար դրամի հարկեր ու այլ պարտադիր վճարումներ էի կատարում»,- գրել է Կարապետյանը: