ՏԵՍԱՆՅՈՒԹ. Վրաստանում վերավաճառել են Անհայտ զինվորի անմար կրակի մոտ դրված ծաղիկները

Արտառոց դեպք է տեղի ունեցել Վրաստանի մայրաքաղաքում: Այստեղ մայիսի 9-ի պաշտոնական տոնակատարություններից անմիջապես հետո անհետացել են Անհայտ զինվորի հուշարձանի անմար կրակի մոտ դրված ծաղիկները, հայտնում է վրացական Sputnik-ը: Աղբյուրը հայտնում է, որ Հայրենական մեծ պատերազմի հերոսների հիշատակը հարգելու եկած անձանց կողմից տեղադրված ծաղիկներն արարողակարգերից կարճ ժամանակ անց անհայտ անձանց կողմից հավաքվել են ու վերավաճառվել այգու մյուս այցելուներին: Այս մասին հայտնի է դարձել այն բանից հետո, երբ ականատեսներից մեկը սոցցանցում հրապարակել է դեպքի պահին արված տեսագրությունը: «Ծաղիկները, որոնք մայիսի 9-ին բերվել էին Անհայտ զինվորի անմար կրակի մոտ, իսկույն ևեթ հավաքում են առևտրականներն ու Բակե այգու մուտքի մոտ կրկին վաճառում են նրանց, որոնք գալիս են հարգելու իրենց ավագ սերնդի հիշատակը»,- գրել է քաղաքացին: Հաղորդվում է, որ տեսանյութի մեկնաբանությունների բաժնում որոշ ժամանակ անց խիստ արձագանք է եղել օգտատերերի կողմից: Նրանք տեղի ունեցածը խայտառակություն են անվանել: Իսկ օգտատերերից մեկն էլ ասել է, որ նույն բանը տեղի է ունենում այդ երկրի գերեզմաններում: Այստեղ էլ արդեն տեղադրված ծաղիկները հավաքվում են ու վերավաճառվում: