Հայաստանում առաջին անգամ անցկացվել է Հարվարդի համալսարանի «Ֆլագշիփ» դասընթաց. ԱՆ

Առողջապահության ոլորտի բարեփոխումների հնարավոր տարբերակների քննարկման նպատակով Համաշխարհային բանկն առողջապահության նախարարության հետ համատեղ Հայաստանում առաջին անգամ կազմակերպել է Հարվարդի համալսարանի «Առողջապահական համակարգերի հզորացում.առողջապահական համընդհանուր ծածկույթի ներդրումն անցումային ժամանակաշրջանում» թեմայով «Ֆլագշիփ» դասընթացը, որին մասնակցում է առողջապահության նախարար Արսեն Թորոսյանը։ Այս մասին տեղեկացրին ՀՀ առողջապահության նախարարությունից։ «Դասընթացին ներկա են նաև բարձրաստիճան պաշտոնյաներ, առողջաահության նախարարության քաղաքականություն մշակողներ , ինչպես նաև այլ պետական մարմիններից ներկայացուցիչներ։ Առողջապահական համընդհանուր ծածկույթը (ԱՀԾ) ենթադրում է ամբողջ ազգաբնակչության համար որակյալ առողջապահական ծառայությունների հասանելիության ապահովում՝ առանց որևէ ֆինանսական խնդրի։ ԱՀԾ և կայուն զարգացման ծրագրի այլ նպատակների իրագործմանը զուգահեռ՝ Հայաստանում տեղի են ունենում բազմաթիվ փոփոխություններ, այդ թվում՝ ժողովրդագրական, համաճարակաբանական և առողջապահության ֆինանսավորման, որոնք ազդում են իրականացվող ծախսերի բնույթի վրա և իրենց ազդեցությունն են թողնում առողջապահական համակարգի վրա։ Մասնակիցները մի քանի օր շարունակ հնարավորություն ունեն վերլուծելու, քննարկելու և մշակելու առողջապահական համակարգերի ամրապնդումը և ՀԱԾ քաղաքականությունը»,- նշված է հաղորդագրության մեջ։