«Իմ մարմինն անձնական է» գրքի հարցը հնարավոր է՝ քննարկվի ՄԻՊ և հանրային հարցերի հանձնաժողովում. Շաքե Իսայան

«Շանթ» հեռուստաընկերության «Հեռանկար» հաղորդաշարի ընթացքում ԱԺ ԲՀԿ խմբակցության պատգամավոր Շաքե Իսայանը անդրադարձել է Մարդու իրավունքների պաշտպանության և հանրային հարցերի հանձնաժողովի աշխատանքներին. «Օրեր առաջ ինձ հետ հանդիպել են տարբեր քաղաքացիներ, հասարակական կազմակերպությունների ներկայացուցիչներ, որոնք նշել են, որ ցանկանում են, որ «Իմ մարմինն անձնական է» գրքի շուրջ ստեղծված հարցը քննարկվի մեր հանձնաժողովում: Եթե հանձնաժողովի անդամները տան իրենց քվեարկությունը, ապա մեծ սիրով քվեարկությունը կկազմակերպենք նաև հանձնաժողովի ներսում»: Շաքե Իսայանը նշեց, որ չի ցանկանա տվյալ գրքի վերաբերյալ իր անձնական դիրքորոշումը հայտնել, և այստեղ իր համար շատ ավելի կարևոր են մասնագետների կարծիքները, որոնց հնարավոր կլինի ծանոթանալ առաջիկայում: