Ֆինանսական հարցերի պարզաբանման արդյունքում ծագած վեճ է. Վանեցյան

Կառավարության նիստից հետո լրագրողների հետ զրույցում ԱԱԾ տնօրեն Արթուր Վանեցյանը անդրադարձավ ԱԱԾ տնօրենի արդեն նախկին տեղակալ Արզուման Հարությունյանի ազատմանը: Նա մասնավորապես ասաց, որ Հարությունյանը ծառայել է ազգային անվտանգության մարմիններում շուրջ 35 եւ ավելի տարի ու նա զեկուցագրով դիմեց՝ իրեն երկարամյա ծառայության կապակցությամբ ազատելու խնդրանքով, որը բավարարվեց: Հարցին՝ Սամվել Բաբայանի կողմնակիցների մեքենայի վրա էին հարձակվել եւ նրանք դիմել էին, որպեսզի ԱԱԾ-ն ստուգումներ իրականացնի, ԱԱԾ-ն այդ հարցով զբաղվո՞ւմ է, Վանեցյանը պատասխանեց. «ԱԱԾ-ն այդ գործով զբաղվում է: Գործն ամբողջությամբ բացահայտված է: Շրջանակը պարզ է: Դավադրություն կամ չգիտեմ ինչ-որ մի բան փնտրել պետք չէ: Դա 2 խումբ անձանց միջեւ ֆինանսական հարցերի պարզաբանման արդյունքում ծագած վեճ է: Առաջիկա ժամերի ընթացքում կլինի հաղորդագրություն՝ ոստիկանության եւ ԱԱԾ-ի համատեղ աշխատանքի վերաբերյալ եւ բոլոր մանրամասները հայտնի կդառնան ձեզ»: Հիշեցնենք, որ երեկ ուշ գիշեր Արցախի ՊԲ նախկին հրամանատար, Արցախի հերոս Սամվել Բաբայանի գրասենյակը հաղորդագրություն է տարածել, ըստ որի, մայիսի 29-ի գիշերը՝ ժամը 3։30-ի սահմաններում, Սևանի մայրուղու Սևան-Մարտունի ճանապարհահատվածին Բաբայանի համակիրների և զինակից ընկերների ճանապարհը փակել են և հրազենից կրակահերթ արձակել: Բաբայանի գրասենյակի փոխանցմամբ՝ «այս բանդաները իրենց պարագլուխներով ծառայում են Արցախի նախկին վարչապետ, իսկ հիմա Արցախի նախագահի թեկնածու, «Ազատ Հայրենիք» կուսակցության նախագահ Արայիկ Հարությունյանին»։ «Եթե իրավապահ մարմինները հետամուտ չլինեն այս ամենի բացահայտմանը, ապա մենք ստիպված կլինենք կիրառել նույն մեթոդները և պատասխան հասցնել նույն ոճով, որովհետև այլ ելք չի մնում», - զգուշացրել է Արցախի պաշտպանության նախկին նախարարի գրասենյակը: