Գլոբալ տաքացման գլխավոր պատճառներից մեկը հանածո վառելիքի օգտագործումն է, անտառահատումը. Հռոմի Պապ

Հռոմի Պապ Ֆրանցիսկոսը կոչ է արել երկրների ղեկավարներին վճռական քայլեր ձեռնարկել և հակազդել կլիմայի փոփոխությանը:

Այս մասին հայտնում է Korrespondent-ը:

Նշվում է, որ այդ վճռական քայլերից է հանածո վառելիքից հրաժարվելը:

Հռոմի Պապը նաև հայտարարել է քրիստոնյաների համար մի քանի շաբաթ տևողությամբ աղոթքների մեկնարկի ազդարարման մասին: Աղոթքները նպատակ ունեն ուշադրություն հրավիրել շրջակա միջավայրի աղտոտման և բնական ռեսուրսների օգտագործման խնդրի վրա:

«Հռոմեակաթոլիկ եկեղեցու առաջնորդն իր ցանկությունն է հայտնել, որպեսզի մարդիկ ավելի շատ մտածեն իրենց առօրեական վնասակար որոշումների և աշխարհի հանդեպ էգոցենտրիկ վերաբերմունքի մասին»,- ասված է հաղորդագրության մեջ:

Պապի հայտարարության մեջ նաև հիշատակվում է  կլիմայի պահպանության թեմայով ՄԱԿ-ի գագաթնաժողովի մասին, որը պետք է տեղի ունենա սեպտեմբերի 23-ին, Նյու Յորքում:

Հռոմի Պապի խոսքով՝ այդ իրադարձությունը հնարավորություն է կառավարությունների համար իրենց ուսերին պատասխանատվություն վերցնելու և քաղաքական կամք դրսևորելու համար՝ հնարավորինս արագ արդյունքի հասնելու նպատակով։

Կաթոլիկ եկեղեցու առաջնորդի խոսքով՝ գլոբալ տաքացման գլխավոր պատճառներից մեկը հանածո վառելիքի օգտագործումն է, անտառահատումը։