Լոռու մարզում երեք տասնյակից ավելի քաղաքացիներ, այդ թվում՝ մանկահասակ երեխաներ, սննդային թունավորմամբ տեղափոխվել են հիվանդանոցներ

Արդեն մի քանի օր է, ինչ Լոռու մարզի տարբեր բուժհաստատություններ են դիմել բազմաթիվ քաղաքացիներ՝ սննդային թունավորման ախտանիշներով, գրում է Shamshyan.com-ը: Ստեփանավանի բժշկական կենտրոնում այս պահի դրությամբ բուժում է ստանում մոտ 15 հիվանդ, իսկ Վանաձորի ինֆեկցիոն հիվանդանոցում բուժվող հիվանդների թիվն անցնում է 3 տասնյակը: 

Հիվանդների թվում կան բազմաթիվ մանկահասակ երեխաներ: SHAMSHYAN.com-ի հետ զրույցում հիվանդանոցներում գտնվող քաղաքացիները, ովքեր հրաժարվեցին տեսախցիկի առաջ խոսել, հայտնել են, որ թունավորվել են «Զեյթուն» ընկերության էկլերներից, իսկ Վանաձորի ինֆեկցիոն հիվանդանոցի տնօրեն Նունե Էվինյանն ասել է, որ բուժվող հիվանդների վիճակը կայուն է, բարեբախտաբար՝ ծանր դեպքեր չեն արձանագրվել: