Կառավարությունը խուճապի չի մատնվելու, էմոցիոնալ, չհաշվարկված որոշումներ չի կայացնելու․ վարչապետ

«Կա մի ընդհանուր ընկալում, որ կորոնավիրուսից հետո կյանքն աշխարհում այլևս չի լինելու նախկինը, բայց թե ինչպիսինն է լինելու` սկսած սպառողական վարքագծի փոփոխություններից, այս պահին դժվար է կանխատեսել»,- մարտի 19-ին կառավարության նիստում ասաց վարչապետ Նիկոլ Փաշինյանը և նշեց, որ ասյս համատեքստում իրենց ուղերձը բիզնեսին և հանրությանն այն է, որ հիմա բոլոր բիզնեսների ու գործունեության տեսակների վերակազմակերպելու և վերանախագծելու ժամանակն է, որ դրանք մրցունակ լինեն հետկորոնավիրուսային աշխարհում:

Կառավարությունը, սովորաբար, ծրագրերը գնահատելիս, շատ ավելի հեշտ է տրվում քաղաքական մարմինների էմոցիոնալ ճնշումների, և մենք կարող ենք դրա հետևանքով գումարները ոչ արդյունավետ օգտագործելու գայթակղությանը տրվել, հետևաբար, պետք է ծրագրերը գնահատող մասնագիտացված և ոչ էմոցիոնալ մարմին, որը պատրաստ լինի ծրագրի որոշակի ռիսկ վերցնել և որոշակի գնահատում իրականացնել:

«Տնտեսական հակաճգնաժամային գործողություններ իրականացնող խումբ կա ձևավորված, որը կառավարության տնտեսական բլոկն է, ԱԺ պատգամավորներ կան ներգրավված և մատը պահելու են տնտեսության զարկերակի վրա»,- նշեց վարչապետը:

Նիկոլ Փաշինյանը նաև նշեց, որ ամենօր տասնյակ նամակներ է ստանում խուճապային բովանդակությամբ և խնդրեց բոլորին պահպանել հանդարտություն:

«Կառավարությունը խուճապի չի մատնվելու, էմոցիոնալ, չհաշվարկված որոշումներ չի կայացնելու, և յուրաքանչյուր որոշում նորից վերաքննելու է` համոզված լինելու համար, որ այդ որոշումը ծառայում է զարգացման նպատակին, և հիմա նորից պնդում եմ` զարգացման ռազամավարություն մեկնարկելու ամենահարմար պահն է, որովհետև աշխարհը վերափոխվում է, հին աշխարհը բոլորիս աչքի առաջ քանդվում է և նոր աշխարհում պետք է հանդես գանք բոլորովին նոր դեմքով, ուժով և իմիջով»,- ընդգծեց վարչապետը: