Լիբանանի իշխանությունները երկարաձգել են Բեյրութի նավահանգստի պայթյունից հետո սահմանված արտակարգ դրությունը

Լիբանանի իշխանությունները երկուշաբթի որոշում են կայացրել ևս մեկ ամսով՝ մինչև սեպտեմբերի 18-ը, երկարաձգել Բեյրութի նավահանգստում տեղի ունեցած պայթյունից հետո սահմանված արտակարգ դրության ռեժիմը:

Ինչպես փոխանցում է РИА Новости-ն, այս մասին ասվում է լիբանանյան կառավարության գլխավոր քարտուղարի հայտարարության մեջ: Որոշումը կայացվել է նախագահի և վարչապետի համաձայնությամբ: Արտակարգ դրությունն օգոստոսի 8-ին սահմանվել էր երկու շաբաթով:

Հզոր պայթյունը Լիբանանի մայրաքաղաքում տեղի էր ունեցել օգոստոսի 4-ին՝ դառնալով հարյուրավոր մարդկանց մահվան պատճառ: Բացի այդ, հարյուր հազարավոր մարդիկ առանց տանիքի են մնացել, հազարավորներն էլ վիրավորվել են:

Այսօր ավելի վաղ հայտնի էր դարձել, որ քննիչները երկրի մաքսային ծառայության պետին ձերբակալելու հրաման են տվել: Քրեական գործեր են հարուցվել ևս 25 մարդու նկատմամբ, մասնավորապես՝ նավահանգստի գլխավոր տնօրեն Հասան Քրեյթի, մաքսային ծառայության պետ Բադրի Դահերի և նրա նախորդի՝ Շաֆիկ Մերիայի: