Փաշինյանի թիկնապահներից մեկի բակում գիշերը նռնակի պայթյուն է որոտացել. 168.am

168․am-ի տեղեկություններով՝ այս գիշեր՝ ժամը 2-ի սահմաններում, միջադեպ է գրանցվել Կոտայքի մարզի Կոտայք գյուղում․ անհայտ անձը նռնակ է նետել բնակիչներից մեկի տան ուղղությամբ: Տուժածներ չկան: 

Կայքի աղբյուրը հայտնել է, որ տանտերն ունի 2 տղա, որոնցից մեկն աշխատում է էլեկտրատեխնիկայի խանութներից մեկում, մյուսը Նիկոլ Փաշինյանի թիկնապահներից է: 

168․am-ը դիմել է ՀՀ Ոստիկանություն՝ ցանկանալով ճշտել միջադեպի մանրամասները: 

«Նոյեմբերի 13-ին՝ ժամը 07:20-ին, ոստիկանություն հաղորդում է ստացվել, զանգահարել է քաղաքացի ու հայտնել, որ տան բակում գիշերը տեղի է ունեցել նռնակի պայթյուն, որի հետևանքով վնասվել են տան պատուհանները: Վնասի չափը և հանգամանքները պարզվում են: Կատարվում է նախաքննություն», - տեղեկացրել են ոստիկանությունից: