Աղմկահարույց քարտեզը եթերում է հայտնվել մարդկային սխալի պատճառով. «Ազատություն»

«Ազատություն» ռադիոկայանն անդրադարձել է իր ուղիղ եթերում հեռարձակված և աղմկահարույց քարտեզին, որում Արցախը Ադրբեջանի կազմում է:

Ֆեյսբուքյան իր էջում լրատվամիջոցը գրել է, որ քարտեզը եթերում է հայտնվել մարդկային սխալի պատճառով:

«Այսօր «Ազատություն TV»-ի ռեպորտաժներից մեկի ցերեկային տարբերակում թյուրիմացաբար օգտագործվել է քարտեզ, որը չի արտահայտում «Ազատության» խմբագրական քաղաքականությունը, եղել է անավարտ և եթերում հայտնվել է մարդկային սխալի պատճառով։
 

Հայցում ենք մեր հեռուստադիտողների ներողամտությունը, տեղեկացնում ենք, որ այն հեռացվել է նյութերից, իսկ սխալը թույլ տված աշխատակիցները ստացել են նկատողություն»,- նշվում է հաղորդագրությունում։