Սերժ Սարգսյանի եղբոր որդին ոչ թե բանտում է, այլ «Իզմիրլյան» բժշկական կենտրոնի VIP հիվանդասենյակում. «Բևեռ»

«Ազգային ժողովրդական բևեռի» ներկայացուցիչներն ու համակիրները երեկ՝ դեկտեմբերի 6-ին, ժամը 18։00-ից հերթական հավաքն էին իրականացնում: 

Հիշեցնենք` նրանք տևական ժամանակ է՝ հավաքվում են Հյուսիսային պողոտայում ու կալանավորված Վարուժան Ավետիսյանին քաղաքացիական հիվանդանոց տեղափոխելու պահանջով նստացույց իրականացնում:

Դեկտեմբերի 6-ի երթը, սակայն, երկար չտևեց, ոստիկանությունը անցավ գործի ու սկսեց ակցիայի մասնակիցներին բերման ենթարկել։ Այս մասին գրում է Հրապարակը: Ոստիկանության գործողություններից հետո ներկայացուցիչները ուղիղ եթերում անդրադարձան միջադեպին, նաև պնդեցին, թե ՀՀ երրորդ նախագահ  Սերժ Սարգսյանի եղբոր՝ Ալեքսանդր Սարգսյանի որդին՝ Նարեկ Սարգսյանը, տևական ժամանակ է`  ոչ թե բանտում է, այլ «Իզմիրլյան» բժշկական կենտրոնի VIP հիվանդասենյակում, որը, նշեցին, որ վերածել է հյուրասենյակի: Այնտեղ պարբերաբար ճաշկերույթներ է կազմակերպվել և այլն։

«Բևեռից» Հերմինե Մկրտչյանի պնդմամբ՝ այդ տեղեկությունից հետո, իրենք արդեն այսօր տեղեկացել են, որ այսօր առավոտյան Նարեկ Սարգսյանին տեղափոխել են ՔԿՀ։