Երբ կհանվեն Լավրովի դեմ պատժամիջոցները

ԱՄՆ պետքարտուղար Մարկո Ռուբիոն երեքշաբթի հայտարարել է, որ ՌԴ ԱԳ նախարար Սերգեյ Լավրովի դեմ պատժամիջոցների հնարավոր չեղարկման հարցը Էր-Ռիադում ԱՄՆ-ի և Ռուսաստանի պատվիրակությունների միջև վերջին բանակցությունների ժամանակ չի բարձրացվել, սակայն կողմերը պետք է «շատ թեմաներ» քննարկեն ապագայում, գրում է РИА Новости–ն:

«Մենք դեռ քննարկումների այդ մակարդակի վրա չենք, բայց, իհարկե, ապագայում շատ թեմաների մասին պետք է խոսենք: Այդ գործընթացը դեռ չի էլ սկսվել, այսօր մենք միայն պայմանավորվածություն ձեռք բերեցինք երկխոսություն սկսելու շուրջ»,- լրագրողներին ասել է նա։

Ավելի վաղ Պետդեպարտամենտը հաստատել էր, որ բանակցությունների ընթացքում քննարկվել են դիվանագիտական ​​առաքելությունների աշխատանքի նորմալացման մեխանիզմը և Ուկրաինայում հակամարտության կարգավորման հետագա քայլերը։