Զելենսկին անմեղ չէ․ Թրամփը՝ Ուկրաինայի դեմ պատժամիջոցներ և մաքսատուրքեր սահմանելու մասին

ԱՄՆ նախագահ Դոնալդ Թրամփը մի շարք նոր հայտարարություններ է արել ռուս-ուկրաինական պատերազմի վերաբերյալ։ APA-ն հաղորդում է, որ նա հատուկ խոսել է ոչ միայն Ռուսաստանի, այլև Ուկրաինայի դեմ պատժամիջոցների և մաքսատուրքերի կիրառման հնարավորության մասին։

«Զելենսկին անմեղ չէ։ Տանգոյի համար երկու հոգի է պետք», - ասել է Թրամփը՝ հավելելով, որ ներկայումս լավ հարաբերություններ ունի Ուկրաինայի նախագահի հետ։

«Ամեն շաբաթ հազարավոր մարդիկ են մահանում, հիմնականում՝ երիտասարդներ։ Եթե ես կարողանամ դա կանխել՝ պատժամիջոցներ սահմանելով կամ  մաքսատուրքեր կիրառելով, դա կլինի յոթ պատերազմների վերջը», - ասաց Թրամփը։

Թրամփը նաև ասել է, որ կփորձի կազմակերպել Ուկրաինայի նախագահ Վլադիմիր Զելենսկու և նրա ռուս գործընկեր Վլադիմիր Պուտինի հանդիպումը։