Պապիկյանը մանրամասներ է ներկայացրել զինծառայության ժամկետի կրճատման նախագծից

Ազգային ժողովի պաշտպանության և անվտանգության հանձնաժողովում քննարկվում է պարտադիր զինվորական ծառայության ժամկետը կրճատելու մասին նախագիծը, որն առաջարկում է ծառայության ներկայիս տևողությունը նվազեցնել վեց ամսով։

Պաշտպանության նախարար Սուրեն Պապիկյանը հայտնել է, որ առաջարկվում է շարքային կազմի 24-ամսյա պարտադիր զինվորական ծառայությունը սահմանել 18-ամսյա ժամկետով։ Այս որոշումը վերաբերվելու է 2026 թվականի հունվարի 1-ից հետո պարտադիր զինվորական ծառայության զորակոչվող քաղաքացիներին։

Կառավարության դեկտեմբերյան որոշման նախագծով նախատեսվում է 2025 թվականի ձմեռային զորակոչի շրջանակներում ԶՈւ-ի համալրման հիմնական գործընթացը սկսել 2026 թվականի հունվարի 7-ից, ինչի արդյունքում 2025 թվականի ձմեռային զորակոչից ծառայության անցնող քաղաքացիները կծառայեն 18 ամիս ժամկետով։

Պապիկյանը նշել է, որ ծառայության ժամկետի կրճատումը չի վերաբերի այն քաղաքացիներին, ովքեր 2026 թվականի հունվարի 1-ի դրությամբ արդեն պարտադիր զինվորական ծառայության մեջ են։

Նախարարի խոսքով՝ ծառայության ժամկետի կրճատումն իրականացել է վերջին տարիներին պայմանագրային զինվորական ծառայության գրավչության բարձրացման և ընդլայնման ուղղությամբ տարվող հետևողական աշխատանքի շնորհիվ։ Նա ընդգծել է, որ իրականացված քայլերի արդյունքում բանակում ծառայելու գրավչությունը զգալիորեն աճել է՝ այդ փաստը գնահատելով դրական։