Սառն օդի լճացումը բերել է օդի աղտոտվածության մակարդակի բարձրացման

Շրջակա միջավայրի նախարարության «Հիդրոօդերևութաբանության և մոնիթորինգի կենտրոն» ՊՈԱԿ-ը հայտնում է, որ վերջին օրերին անտիցիկլոնի կենտրոնի առկայությունը, օդի տուրբուլենտականության դադարն ու քամու բացակայությունը պայմանավորել են Արարատյան գոգավորությունում սառը օդի լճացում, ինչը բերել է օդի աղտոտվածության մակարդակի բարձրացման։

Ըստ հաղորդագրության՝ դիտվել է ազոտի և ծծմբի երկօքսիդների կոնցենտրացիաների աճ, մինչդեռ փոշու մակարդակում էական փոփոխություն չի գրանցվել։

Նշվում է, որ առաջիկա հինգ օրերին օդերևութաբանական պայմաններում զգալի փոփոխություններ չեն սպասվում։ Քանի որ անտիցիկլոնի կենտրոնը շարունակելու է մնալ հանրապետության տարածքում, կանխատեսվում է օդի աղտոտվածության աստիճանական նոր բարձրացում։