Ռոբերտ Քոչարյանը դատարանում հանդես է եկել ելույթով

Չեմ կարծում, որ որոշում կայացվի, հավանական է, որ վաղը կրկին նիստ կնշանակվի` հաշվի առնելով այս տեմպը, արագությունը: Այս մասին լրագրողների հետ զրույցում նշեց ՀՀ երկրորդ նախագահ Ռոբերտ Քոչարյանի պաշտպան Արամ Օրբելյանը։ Հիշեցնենք, որ ՀՀ վերաքննիչ քրեական դատարանը դռնփակ նիստում այսօր շարունակում է ՀՀ երկրորդ նախագահ Ռոբերտ Քոչարյանի կալանավորման որոշումն անձեռնմխելիության հիմքով վերացնելու վերաբերյալ բողոքի քննությունը: Պաշտպանը հայտնեց, որ Ռոբերտ Քոչարյանը ներկա է եղել նիստին, ելույթ է ունեցել: Ելույթի մասին մանրամասներ չհայտնեց, միայն ասաց, որ ելույթը եղել է ոչ թե քաղաքական թեմայով, այլ գործընթացի մասին: «Հիմա պետք է անցնենք դատախազների համապատասխան առարկություններին` բուն խափանման միջոցի հետ կապված, որից հետո կքննարկվեն մնացած հարցերը: Այս պահին դեռ կարճ ժամանակ են խնդրել, բայց կարծում եմ, որ նորմալ ընդմիջում պիտի տրվի, գոնե 1-1.5 ժամ»,- ասաց նա: Լրագրողները հետաքրքրվեցին` ինչպիսի՞ ելք է կանխատեսում այս դատական գործընթացում, ինչին նա արձագանքեց, որ միշտ լավատես է, և կարծում է, որ ելքը դրական է լինելու իրենց համար: Նա նաև անդրադարձավ հնչող կարծիքին, թե «անձեռնմխելի մարդիկ չկան»: