Աշխատանքից ազատված որոշ ոստիկաններ ընտանիքներով լքել են Հայաստանը․ Օսիպյան

Ճանապարհային ոստիկանությունն իր գործողություններում կաշկանդված չէ։ Այսօր, լրագրողների հետ զրույցում, հայտարարեց ՀՀ ոստիկանության պետ Վալերիյ Օսիպյանը` արձագանքելով դիտարկմանը, թե կան արտոնյալներ, ովքեր երթևեկում են շարասյուներով, երթևեկության կանոնները խախտելով ու «չեն փռվում ասֆալտին»։ «Մենք «ոչ» ենք ասել կոռուպցիային, և վստահեցնում եմ ձեզ` ՀՀ ոստիկանությունում չկա կոռուպցիայի որևէ դրվագ, որևէ դեպք։ Ճանապարհային ոստիկանությունն այսօր ավելի լավ է աշխատում, քան նախկինում»,– ասաց Օսիպյանը։ Ոստիկանապետը հայտնեց նաև, որ աշխատանքից ազատել է ՃՈ մի քանի աշխատակիցների, որոնց վերաբերյալ կասկածներ է ունեցել, որ չեն կարող աշխատել նոր իրավիճակում։ Ըստ Օսիպյանի՝ աշխատանքից ազատված ոստիկանների թիվը մոտ 20-ից 25 է։ Նոր իրավիճակին չհարմարված ոստիկաններից շատերն իրենք են ազատվել աշխատանքից ու անգամ ընտանիքներով հեռացել Հայաստանից։