Սա՞ է ձեր փայլուն հարաբերությունները, պարոնա՛յք. Շարմազանովն` իշխանություններին

Ելույթներ ունենալու,շոուներ ու քայլերթեր կազմակերպելու փոխարեն, Փաշինյանը թող բարի լիներ եւ սպասարկեր մեր ազգային-պետական շահը: Այս մասին իր ֆեյսբուքյան էջում գրառում է կատարել Ազգային ժողովի նախկին փոխխոսնակ Էդուարդ Շարմազանովը։ «Սկսած 18-րդ դարի սկզբից, իսկ ավելի ստույգ՝ Իսրայել Օրու նախաձեռնությունից սկիզբ դրվեց հայ-ռուսական ռազմավարական գործընկերությանը, որը ժամանակի ընթացքում վերաճեց դաշնակցային ամուր հարաբերությունների: Հայաստանի նորագույն պատմության ընթացքում հայ-ռուսական դաշնակցային հարաբերությունների բնույթը կարեւորվել է թե՛ Հայաստանի եւ թե՛ Ռուսաստանի քաղաքական վերնախավի կողմից: Ակնհայտ է, որ այդ հարաբերությունների դաշնակցային բնույթը բխում է մեր երկու պետությունների շահերից: Ապրիլ-մայիսյան Նիկոլի իշխանազավթման օպերացիայից հետո ես բազմաթիվ առիթներով իմ մտահոգությունն եմ հայտնել այդ հարաբերություններում առկա անցանկալի զարգացումների վերաբերյալ: Փոխարենը՝ լսել եմ Նիկոլի հավաստիացումները,թե հայ-ռուսական հարաբերությունները երբեք այսքան փայլուն չեն եղել: Հիմա ամեն ինչ հերթով... Լավրովը հայտարարում է,թե Հայաստանի նոր իշխանությունը մի բան ասում է,իսկ մեկ այլ բան անում: Իսկ մեր դուխով վարչապետը հայտարարում է, թե ամեն բան լավ է: Հայաստանը զրկվում է ՀԱՊԿ գլխավոր քարտուղարի պաշտոնից: Ավելին՝ ՀԱՊԿ անդամ երկրները սատարում են Բելառուսին այս հարցում: Գազի գինը սահմանին թանկանում է: Եվ վերջապես, առաջին անգամ Ռուսաստանի պատգամավորական կորպուսի ներկայացուցիչները մասնակցում են այսպես կոչված Խոջալուի հիշատակի միջոցառումներին: Սա՞ է ձեր փայլուն հարաբերությունները,պարոնա՛յք: Տարօրինակ է, որ ԱԺ պատվիրակությունը Ռուսաստանի Պետական դումայի ղեկավարության ընդունելությանը չի արժանացել: Ինչու՞: Ափսոսանքով պետք է նշեմ,որ երբեմնի վստահելի եւ իրական դաշնակցային հարաբերությունները այսօր արդեն վտանգված են: Ելույթներ ունենալու,շոուներ ու քայլերթեր կազմակերպելու փոխարեն, Փաշինյանը թող բարի լիներ եւ սպասարկեր մեր ազգային-պետական շահը: Հ.Գ. Ասել եւ ասում եմ՝ В политике главное не болтовня, а эффективность»,–գրել է նա։