Ֆաբրիկայի ղեկավարն ու ինժեները ծեծի են ենթարկել աշխատակցին. Արտակարգ դեպք Սյունիքում

SHAMSHYAN. com-ի տեղեկություններով՝ ոստիկանության Մեղրիի բաժնի հետաքննչական բաժանմունքում նյութեր են նախապատրաստվում Ագարակ քաղաքի բնակիչ, 28-ամյա Նվեր Մարգարյանի դիմումի փաստով: Ինչպես հայտնում է ֆոտոլրագրող Գագիկ Շամշյանը, վերջինս ոստիկաններին հայտնել է, որ մարտի 9-ին ժամը 12:00-ի սահմաններում «Ագարակի պղնձամոլիբդենային կոմբինատ»-ի տարածքում իր հետ վիճաբանել, իր նկատմամբ հայհոյանքներ են հնչեցրել, ապա ձեռքերով և ոտքերով իր մարմնի տարբեր մասերին են հարվածել Ագարակ քաղաքի բնակիչներ, 34-ամյա Վահե Դավթյանն ու 32-ամյա Հրանտ Կարապետյանը: Ն, Մարգարյանը ոստիկաններին հայտնել է, որ ծեծի արդյունքում ինքը վնասվածքներ է ստացել, այդ թվում՝ աջ հոնքային շրջանում: Ոստիկանության Մեղրիի բաժնում ձեռնարկվում են անհրաժեշտ միջոցառումներ՝ նշված անձանց հայտնաբերելու և ոստիկանության Մեղրիի բաժին հրավիրելու ուղղությամբ: Գ. Շամշյանի տեղեկություններով՝ Ն. Մարգարյանը աշխատում է նշված կոմիբինատում՝ որպես պոչուկային տեղամասի կարգավորող, Վ. Դավթյանը նշված կոմիբինատի հարստացուցիչ ֆաբրիկայի ղեկավար, իսկ Հ. Կարապետյանը՝ նշված կոմբինատի հարստացուցիչ ֆաբրիկայի ինժեներ: