Զինվորականին դանակի մի քանի հարվածներ հասցրած ու փախուստի դիմած կասկածյալին հայտնաբերել են

Քիչ առաջ ոստիկանության Երևան քաղաքի վարչության քրեական հետախուզության բաժնի ծառայողների ձեռնարկված օպերատիվ-հետախուզական և քննչական համատեղ գործողությունների արդյունքում պարզել են այսօր՝ մարտի 25-ին, Նուբարաշեն վարչական շրջանում ՀՀ ՊՆ N զորամասում ծառայող սպային դանահակահարածի ինքնությունը: Ինչպես հայտնում է ֆոտոլրագրող Գագիկ Շամշյանը, այսօր ժամը 03:30-ի սահմաններում Էրեբունի բժշկական կենտրոնից ոստիկանության Էրեբունի բաժին հայտնել են, որ «ձախ կրծքավանդակի հետին մակերեսի, ձախ գոտկային շրջանի, ձախ նստատեղի կտրած-ծակած վերքեր» ախտորոշմամբ իրենց մոտ է տեղափոխվել մի քաղաքացի: Ոստիկանները պարզել են, որ վիրավորը Նուբարաշեն վարչական շրջանի բնակիչ, 29-ամյա Արշակ Դանիելյանն է, ով, ըստ բժիշկների հայտարարության, ի վիճակի չի եղել կատարվածի մասին տեղեկություններ հայտնել: Մինչ Էրեբունու հիվանդանոցի բժիշկները կպայքարեին վիրավորի կյանքի համար, ինչը նրանց հաջողվել է, Էրեբունու ոստիկաններն ու քննիչները պարզել են, որ Ա. Դանիելյանին դանակի մի քանի հարվածներ է հասցրել Նուբարաշեն վարչական շրջանի բնակիչ, 30-ամյա Զավեն Քեշիշյանը, ով դեպքից հետո դիմել էր փախուստի: Այսօր ոստիկանների ու քննիչների կողմից կատարված բացատրական աշխատանքների արդյունքում Զ. Քեշիշյանը փաստաբանի ուղեկցությամբ ներկայացել է քննչական բաժին: Ֆոտոլրագրողի տեղեկություններով՝ հաշվի առնելով հանցագործության վտանգավորության աստիճանը, օպերատիվորեն դեպքի վայր են ժամանել նաև Էրեբունի և Նուբարաշեն վարչական շրջանների դատախազության ներկայացուցիչները: