Դիջեյ լինելը ամո՞թ ա. Փաշինյանը` Էդուարդ Աղաջանյանից դժգոհ լինելու լուրերի մասին

Վարչապետ Նիկոլ Փաշինյանն այսօր լրագրողների հետ զրույցում անդրադարձել է հարցին, թե դժգոհություններ կան իր թիմի որոշ պաշտոնյաների նկատմամբ, չի՞ պատրաստվում նրանց փոխել, օրինակ, կառավարության աշխատակազմի ղեկավար Էդուարդ Աղաջանյանին, Արարատի մարզպետ Գարիկ Սարգսյանին: “Բայց ինչո՞ւ պետք է Էդուարդ Աղաջանյանից դժգոհ լինեմ: Դիջեյ լինելը ամո՞թ ա: Մոնակոյի համալսարանն ա ավարտել Էդուարդ Աղաջանյանը: Գարիկ Սարգսյանը ժողովրդավարական ճանապարհով ընտրված գյուղապետ է եղել, հանրապետությունում տասնյակ տարիներ այդպիսի բան տեղի չի ունեցել: Ասենք ասում են՝ Հակոբ Արշակյանն ասաց՝ փետրվարի 30, վա՞յ: Դա ի՞նչ ա, եթե վրիպակ չի: Ես պատրաստ եմ առարկայական քննարկել ամեն ինչ, որ ասում եք՝ գոհ են կամ դժգոհ են, ի՞նչ են արել այդ մարդիկ: Եթե բան են արել, գոհի ու դժգոհի մասին չէ խոսքը, կտանենք կդատենք և պատասխանատվության կենթարկենք”,- ասաց Փաշինյանը: Նա հավելեց. “Ազատ ու արդար ընտրություններում Գարիկ Սարգսյանը ստացել է 20 հազարից ավելի ձայն: Այսինքն՝ մարզպետի աշխատանքը ո՞վ է գնահատում: Մարզպետի աշխատանքը առաջին հերթին գնահատում է մարզի ժողովուրդը”: Դիտարկմանը, որ էյֆորիայի ազդեցության տակ են ձայները տրվել իր թիմի ներկայացուցիչներին, նա պատասխանեց. “Բայց ինչի՞ ուրիշը չի ստացել այդ ձայները էյֆորիայի ազդեցության տակ: Իմ քայլը 7-8 թեկնածու է ունեցել այնտեղ”: