Որպես անհետ կորած որոնվող 79-ամյա քաղաքացու դին հայտնաբերվել է Արտաշատի ջրանցքում

Այսօր՝ մայիսի 7-ն, արտակարգ դեպք է տեղի ունեցել Արարատի մարզում։ Ժամը 11։00-ի սահմաններում Ջրաշեն գյուղի գյուղապետ Արտյոմ Ղազարյանը ոստիկանության Արտաշատի բաժին ահազանգ է տվել, որ գյուղով անցնող Արտաշատի մայր ջրանցքում տղամարդու դի կա։ Ինչպես տեղեկացնում է shamshyan .com-ը, արտակարգ իրավիճակների նախարարության փրկարար ծառայության հրշեջ-փրկարարները պարանների միջոցով դին դուրս են բերել ջրանցքից: Դեպքի վայրում հավաքվածներն ասում էին, որ ջրահեղձ եղած քաղաքացին ոստիկանության Շենգավիթի բաժնի կողմից որպես անհայտ կորած որոնվող, 79-ամյա Շահեն Գաբուլյանն էր։ Քննիչի որոշմամբ նշանակվել է դիակի դատաբժշկական փորձաքննություն, և այս պահին դիակի զննություն է կատարում Արարատի մարզային դատաբժշկական բաժնի վարիչ Արմեն Գևորգյաը։ Ըստ նախնական տեղեկությունների՝ դիակի վրա բռնության հետքեր չկան։