Երեկվանից սարսափած եմ, ամբողջ գիշեր չեմ քնել․ Մարուքյանը՝ Քոչարյանի հայտարարության մասին

ՀՀ երկրորդ նախագահ Ռոբերտ Քոչարյանը Reuters-ին տված հարցազրույցում ասել էր, որ Հայաստանի նոր իշխանության դեմ հզոր ընդդիմություն է ձևավորվում և ինքը նույնպես ուզում է լինել նրանց շարքերում: «Երեկվանից սարսափած եմ, ամբողջ գիշեր չեմ քնել, չգիտեմ՝ ոնց ենք անելու»,- արձագանքեց «Լուսավոր Հայաստան» խմբակցության ղեկավար Էդմոն Մարուքյանը՝ հեգնելով Քոչարյանին: Հարցին՝ իր կարծիքով կհաջողվի՞ ինչ-որ լուրջ քաղաքական թիմ հավաքել և պայքարել, Մարուքյանը պատասխանեց. «Այսինքն՝ ի՞նչ ուժեր: Այսօր կա ընդդիմություն, կա իշխանություն և բավականին սուր հակադրություններ կան, իսկ ինչ կոնտեքստում են պայքարը պատկերացնում, չգիտեմ, Հայաստանում քաղաքական ուժեր կան, որոնք տարբեր տեսլականներ ունեն»: Դիտարկմանը, որ Ռոբերտ Քոչարյանն ասել էր, որ մարտահրավեր է նետում իշխանությանը, նա ինչո՞ւ է սարսափած, Մարուքյանը պատասխանեց. «Քանի որ նրանք անդադար պնդում են, որ Հայաստանում ընդդիմություն չկա, դրա համար: Ես շեշտեցի, որ Հայաստանում քաղաքական առողջացման պրոցեսում ձևավորված է իշխանություն, ձևավորված են ընդդիմադիր ուժեր՝ խորհրդարանական և արտախորհրդարանական, և եթե մենք կարողանանք այս նոր մշակույթի ձևավորմամբ շարժվել առաջ, քաղաքական մթնոլորտը կառողջացնենք, եթե չէ՝ նորից հետ գանք ատելության խոսքին ու դրա քարոզին, բնականաբար, լուրջ խնդիրներ ենք ունենալու»: