Պետք է Քոչարյանին թույլ տային մասնակցել Եռատոնին․ Վ. Բալասանյան

«Պետք է հարգեին Արցախի գործող և նախկին նախագահների դիմումը և րոպե առաջ այդ որոշումը կայացնեին։ Նրանց դիմումը չէր վերաբերում ընդհանրապես քրեական գործը կասեցնելուն կամ հետապնդումը դադարեցնելուն։ Նրանց դիմումը վերաբերում էր նրան, որ գոնե այս օրերին բոլոր նախագահները մասնակցեին այս տոներին»,- Արցախում գտնվող լրագրողների հետ ճեպազրույցում հայտարարել է Բալասանյանը։ Դիտարկմանը, թե տեսակետ կա, որ Արցախի իշխանությունները խառնվում են Հայաստանի ներքին գործերին, Բալասանյանն արձագանքեց. «Մենք ժամանակին ասել ենք՝ ունենք երկու հայկական պետություն՝ մեկ հայրենիք։ Ինչի՞ մասին է խոսքը»։ Հիշեցնենք՝ Արցախի գործող ու նախկին նախագահները դիմել էին Գլխավոր դատախազ Արթուր Դավթյանին՝ խնդրելով փոխել ՀՀ 2-րդ նախագահ, Արցախի նախկին նախագահ Ռոբերտ Քոչարյանի խափանման միջոց կալանքը։