Մահափորձը բեմադրվել է Սուրիկ Խաչատրյանի կողմից․ Տիգրան Կարապետյանը՝ գլխավոր դատախազին

«Վերջերս՝ Սյունիքի նախկին մարզպետի մահափորձի դատավարության ժամանակ, մեղադրյալ անձը հայտարարեց, որ մահափորձ չի եղել ու այդ ամենը բեմադրվել է նախկին մարզպետի հետ միասին: Ի՞նչ քայլեր եք ձեռնարվում, քանի որ գործ ունենք ՀՀ նախկին բարձրաստիճան պաշտոնյայի հետ»,-այսօր ԱԺ-ում դիմելով գլխավոր դատախազ Արթուր Դավթյանին նման հարց ուղղեց «Իմ քայլը» խմբակցության պատգամավոր Տիգրան Կարապետյանը։ Արթուր Դավթյանն ասաց, որ գործն իրենց ուշադրության կենտրոնում է. «Ներկայում վարույթ է նախաձեռնվում հանգամանքները ստուգելու ուղղությամբ. սա շատ կարևոր հանգամանք է»: Հիշեցնենք՝ ենթադրյալ դեպքը տեղի էր ունեցել 2015 թվականի մայիսի 20-ին. Կապան-Գորիս ավտոճանապարհին անհայտ անձինք կրակոցներ էին արձակել Սյունիքի նախկին մարզպետ Սուրիկ Խաչատրյանի մեքենայի ուղղությամբ: Մեքենայում եղած 3 անձանցից որևէ մեկը՝ Լիսկան, նրա վարորդը և օգնականը, չէին տուժել: Դեռևս այդ ժամանակ մամուլում տեղեկություններ էին շրջանառվում, որ տեղի ունեցածը ոչ թե մահափորձ է, այլ՝ բեմադրություն: