Քոչարյանի գործով մեղադրող կողմը վկաների 800 հոգանոց ցուցակ է ներկայացրել

Այս պահի դրությամբ մեղադրող կողմը ներկայացրել է վկաների 800 հոգուց բաղկացած ցուցակ, մենք այս պահի դրությամբ ներկայացրել ենք 10 հոգանոց ցուցակ: Այս մասին լրագրողների հետ զրույցում ասաց ՀՀ երկրորդ նախագահ Ռոբերտ Քոչարյանի պաշտպաններից Հայկ Ալումյանը: «Մեր ցուցակում կան ՍԴ դատավորներ, Սամվել Մայրապետյանը, Միքայել Հարությունյանը: Ընդհանուր պարզ է, որ այդ 800 վկան կարող են հարցաքննվել մի 4 տարում»,- նշեց Ալումյանը: Հարցին՝ ՍԴ դատավորներն ի՞նչ առնչություն ունեն Քոչարյանի մեղադրանքին, Ալումյանը պատասխանեց՝ «Պարոն Քոչարյանի մեղադրանքի մեջ, ի թիվս այլի, կա այնպիսի դրույթ, որ այդ ժամանակ ճնշում է եղել ՍԴ դատավորների նկատմամբ, ընդ որում՝ առանց մասնավորեցնելու՝ որ դատավորների վրա է ճնշում եղել և ինչպես է արտահայտվել այդ ճնշումը: ՍԴ բոլոր դատավորներից անհասկանալի սկզբունքով ընտրվել է 2 դատավոր և նախաքննության ընթացքում հենց նրանց են հարցաքննել: Երկուսն էլ, ի դեպ, ժխտել են իրենց նկատմամբ ճնշումը»: Ալումյանի խոսքով՝ դատարանին միջնորդություն արդեն ներկայացրել են և պատրաստվում են պնդել, որ պետք է հրավիրվեն ՍԴ մնացած դատավորները՝ հասկանալու ի՞նչ ճնշումների մասին է խոսքը և ո՞ւմ նկատմամբ է այդ ճնշումը կատարվել և ինչպես է դա արտահայտվել: