«Արսենալ»-ը, հնարավոր է, Ադրբեջան մեկնի առանց Հենրիխ Մխիթարյանի. The Guardian

Անվտանգության նկատառումներով Լոնդոնի «Արսենալ»-ը Ադրբեջան կմեկնի առանց Հենրիխ Մխիթարյանի։ Այս մասին հայտնում է Rusarminfօ-ն։ «Նախորդ շաբաթ ՈՒԵՖԱ-ից Մխիթարյանի անվտանգության երաշխիքներ են պահանջել՝ Ադրբեջանի և Հայաստանի միջև քաղաքական լարվածության պատճառով, բանակցությունները շարունակվում են։ «Արսենալ»-ի որոշումը կհայտարարվի հաջորդ շաբաթվա սկզբին, սակայն թիմը լավատես չէ այդ հարցում»,- հաղորդում է բրիտանական The Guardian-ը։ The Guardian-ի հաղորդմամբ՝ և՛ Հենրիխ Մխիթարյանը, և՛ ակումբը հիասթափված են։ Ընդ որում, «Արսենալ»-ը մտադիր չէ բոյկոտել եզրափակիչ խաղը, որը հաղթելու դեպքում թիմը կհայտնվի Չեմպիոնների լիգայում։ Ավելի վաղ հայտնել էինք, որ Լոնդոնի «Արսենալ»-ի և Հայաստանի հավաքականի կիսապաշտպան Հենրիխ Մխիթարյանը կարող է բաց թողնել Եվրոպայի լիգայի եզրափակիչ՝ «Չելսի»-ի հետ հանդիպումը, որը կկայանա մայիսի 29-ին՝ Բաքվում: Բրիտանական Daily Mail-ը գրում է, որ քաղաքական պատճառներով Մխիթարյանը կարող է չմեկնել Բաքու: