Բարձրագույն դատական խորհուրդն արտահերթ նիստ է հրավիրել. Tert am

Բարձրագույն դատական խորհրդի անդամները եկել են աշխատանքի։ Tert. am-ի թղթակիցը Բարձրագույն դատական խորհրդի շենքից հայտնում է, որ քիչ առաջ մեկնարկել է Բարձրագույն դատական խորհրդի արտահերթ նիստը, և այն դեռ շարունակվում է։ Ենթադրվում է, որ նիստի օրակարգում ՀՀ վարչապետ Նիկոլ Փաշինյանի գրառումն է դատարանների ելքերն ու մուտքերը փակելու վերաբերյալ։ Հիշեցնենք, որ ՀՀ վարչապետ Նիկոլ Փաշինյանը ֆեյսբուքյան իր էջում գրել էր, որ վաղը առավոտյան արգելափակում են հանրապետության դատարանների ելքերն ու մուտքերը: «Առավոտյան ժամը 08.30-ից արգելափակում ենք հանրապետության՝ առանց բացառության բոլոր դատարանների ելքերն ու մուտքերը, այնպես, որ ոչ ոք ներս չմտնի: Ժամը 12.00-ին իմ ելույթը հեռարձակվում է ուղիղ եթերում»,-գրել էր նա: Ավելի վաղ դատարանը փոխել էր ՀՀ երկրորդ նախագահ Ռոբերտ Քոչարյանի խափանման միջոցը: Հիշեցնենք, որ ՀՀ 2-րդ նախագահ Ռոբերտ Քոչարյանին կալանքից ազատելու երաշխավորությամբ էին հանդես եկել Արցախի նախագահ Բակո Սահակյանը և նախկին նախագահ Արկադի Ղուկասյանը: ԲԴԽ շենքի տարածքում գտնում է նաև ԱԱԾ բարձրաստիճան պաշտոնյայի մեքենա, որի լուսանկարը ներկայացնում ենք ստորև: