Էրիկ Գրիգորյանը՝ բնական եղևնիների վաճառքի վերահսկողության մասին

ՀՀ շրջակա միջավայրի նախարար Էրիկ Գրիգորյանին այսօր լրագրողները հարց ուղղեցին՝ արդյո՞ք տոնածառերի վաճառքի վերահսկողություն իրականացվում է:

Նախարարը հայտնեց, որ տոնածառ հատելու թույլտվություն չի տրվել որևէ մեկին, միայն Գյումրու քաղաքապետարանն է դիմել, որ սանիտարական հատման ենթակա ճյուղերից հատեն, Գյումրու տոնածառը ձևավորեն:

«Այլ առանձին քանակ չունենք, ունենք սանիտարական և խնամքի հատումներ, վաճառվող եղևնիների ավելի քան 99 տոկոսը ներմուծված ծառերն են»,- ասաց նա:

Գրիգորյանը նշեց, որ եղևնիների հատման վերահսկողությունն իրականացնում է տեսչական մարմինը, յուրաքանչյուր բնապահպանական հնարավոր իրավախախտման դեպքում աշխատակիցները մոտենում են, հարցնում, ուսումնասիրում, տվյալները ստուգում: