Չենք պատրաստվում լքել Դադիվանքը․ Տեր Հովհաննեսը՝ Ադրբեջանից հնչած հայտարարության մասին

Վանահայր Տեր Հովհաննես քահանա Հովհաննիսյանը պնդում է, որ իրենք չեն պատրաստվում լքել Դադիվանքը:

«Նրանք ինչ ուզում ասում են, որովհետև ՀՀ առաջնորդը Արցախը ճանաչում է որպես Ադրբեջանի տարածքային ամբողջականություն: Գնացեք, այդ հարցը հենց նրան տվեք, թե ինչ է մտածում այդ կապակցությամբ», - Aysor.am-ի հետ զրույցում ասել է Տեր Հովհաննես քահանա Հովհաննիսյանը:

Նրա խոսքով՝ այս պահին բոլոր  վանականները, ինքը գտնվում են Դադիվանքում.«Ես այստեղ եմ, իմ հողի վրա, իմ տան մեջ, իմ եկեղեցում: Թող այդ հարցին պատասխանի Հայաստանի Հանրապետության ոմն առաջնորդը»:

Մայր Աթոռի՝ ԶԼՄ-ների գծով պատասխանատու Հռիփսիմե Առաքելյանն լրատվամիջոցի հետ զրույցում ասսել է, որ այս պահին այդ հարցն է քննարկվում և շուտով կհայտարարվի դիրքորոշումը:

Հիշեցնենք, որ  Ադրբեջանը պահանջում է, որպեսզի հայ վանականները լքեն Դադիվանքը։

«Հայ վանականները պետք է լքեն Խուդավենգը (Դադիվանք)», - APA գործակալությանն ասել է Ադրբեջանի կրոնական կազմակերպությունների հետ աշխատանքի պետական կոմիտեի նախագահ Մուբարիզ Գուրբանլին։