Տասնյակ դեպքեր են եղել, երբ Ադրբեջանը թույլ չի տվել մահացածի մարմինը տեղափոխել շրջափակված Արցախ

Արդեն 7 ամիս է՝ Արցախը լիակատար շրջափակման մեջ է և այս ընթացքում բազմաթիվ են դեպքերը, երբ ճանապարհի փակ լինելու պատճառով մարդիկ չեն կարողացել իրենց մահացած ծնողների, հարազատների մարմինները տեղափոխել Արցախ: Այս մասին այսօր Oragir.News-ի հետ զրույցում ասել է Հայաստանի Հանրապետությունում Արցախի մշտական ներկայացուցչության մամուլի քարտուղար Արմինե Հայրապետյանը։ 

«Ադրբեջանական կողմը թույլ չի տալիս նույնսիկ մահացած մարդկանց տեղափոխել Արցախ և հուղարկավորել հարազատ հողում՝ ընտանեկան գերեզմանատանը։ Դեպքեր կան, որ ամուսինը զոհվել է, կինը Երևանում՝ բուժման ընթացքում մահացել է, իսկ որդին այդպես էլ չի կարողացել միավորել 2 ծնողներին։ Տարբեր են մահացության դեպքերը և մամուլում էլ են եղել հրապարակումներ։ Այս 7 ամիսների ընթացքում շուրջ 50 նման դեպք է եղել, երբ Արցախի քաքաղաքացիները, այդ թվում՝ արտերկրում ապրող արցախցիները, իրենց հանգուցյալին չեն կարողացել տեղափոխել Արցախ»,- ասել է Արմինե Հայրապետյանը։