Ունեինք 2 տարբերակ. Խորեն Գրիգորյանն` Արաբկիրում ոռոգման համակարգի անցկացում իրականացնելու մասին

Հարգելի երևանցիներ, հարգելի արաբկիրցիներ: Արաբկիր վարչական շրջանում ոռոգման համակարգի անցկացում է իրականացվում: Այս մասին ֆեյսբուքյան իր էջում գրել է Երևան քաղաքի շինարարության և բարեկարգման վարչության պետի ժամանակավոր պաշտոնակատար Խորեն Գրիգորյանը:

«Ունեինք 2 տարբերակ`

Ա. ճանապարհը ամբողջական փակել և ոռոգման համակարգն անցկացնել

Բ. Ճանապարհը թողնել երթևեկելի, ավելի բարդացնելով մեր աշխատանքը, ամեն օր աշխատանքային ավարտից հետո գրունտային շերտ տեղադրել, մեքենաները չվնասելու համար:

Քաղաքային ծանր երթևեկության պայմանները հաշվի առնելով ` աշխատանքներն իրականացնում ենք երկրորդ տարբերակով:

Հայցելով բոլորի ներողամտությունը տեղեկացնում եմ, որ առաջիկա երեք օրերի ընթացքում առնվազն ասֆալտբետոնյա ստորին շերտը տեղադրված կլինի»,- գրել է Գրիգորյանը:

Auroranews-ը կապ հաստատեց Երևանի քաղաքապետարան, որպեսզի ճշտի, թե որ փողոցն է փակ լինելու: Քաղաքապետարանից մեզ հայտնեցին, որ խոսքը Արաբկիր վարչական շրջանի «Աղրուցյան» փողոցի մասին է:

Հավելենք, որ  ավելի վաղ՝ նախընտրական շրջանում, Տիգրան Ավինյանը Radio Aurora-ի ուղիղ եթերում՝ պատասխանելով հարցին, թե արդյոք Երևանում ոռոգման համակարգի անցկացում իրականացվելու է, պատասխանել է՝ այո։