Ուկրաինայի ԶՈՒ-ն ևս 2 կիլոմետր առաջ է շարժվել Կուրսկի շրջանում

Ուկրաինայի պաշտպանության ուժերը շարունակում են հարձակողական գործողությունները Կուրսկի շրջանում։ Մեկ օրվա ընթացքում զինվորականներին հաջողվել է եւս երկու կիլոմետր առաջ շարժվել որոշակի ուղղություններով։ Այս մասին հայտարարել է Ուկրաինայի զինված ուժերի գերագույն գլխավոր հրամանատար Ալեքսանդր Սիրսկին Գերագույն գլխավոր հրամանատարի շտաբի նիստի ժամանակ։

«Հարձակողական գործողությունը շարունակվում է Կուրսկի ուղղությամբ մեկ օրվա ընթացքում մեր զորքերը որոշակի ուղղություններով առաջ են շարժվել մինչև 2 կիլոմետր և իրենց վերահսկողության տակ են վերցրել 5 քառակուսի կիլոմետր տարածք»,- ասել է նա։

Նաև, ըստ Սիրսկու, ամենադժվար իրավիճակը մնում է Ուկրաինայի ռազմաճակատի Պոկրովսկու ուղղությամբ:

«Հակառակորդը փորձում է ճեղքել մեր զորքերի պաշտպանությունը, սակայն այսօր առավոտվա դրությամբ բոլոր հարձակումները հետ են մղվել, հակառակորդը հաջողություն չի ունեցել»։

Մյուս ուղղություններում, ինչպես հավելել է Սիրսկին, իրավիճակը շարունակում է մնալ բարդ, բայց վերահսկելի։