Քրեական հեղինակություններին պարզաբանվել է, որ զերծ մնան ընտրական գործընթացներից

Ոստիկանության Լոռու մարզային վարչության և վերջինիս ենթակայության տակ գտնվող ոստիկանության բաժինների ծառայողները իրականացրել են հերթական օպերացիան, որը կրել է «Գալիս է փաթիլ-փաթիլ, գնում է կաթիլ-կաթիլ» անունը: Այս մասին հայտնում է SHAMSHYAN.com-ը։ Օպերացիայի ընթացքում ոստիկանության բաժիններ են տարվել ավելի քան 40 անձինք, որոնց մի մասը Լոռու մարզում քրեական հեղինակություններ են համարվում, մի մասը՝ նախկինում դատապարտված են եղել ՀՀ քր-օր-ի տարբեր հոդվածներով, մեծ մասն էլ Վանաձորում հայտնի մականունավորներ են եղել, որոնց մասին տեղի բնակչությունը տեղյակ է լինում ընտրությունից ընտրություն: Ֆոտոլրագրողի տեղեկություններով, ոստիկանության բաժիններում նշված անձանց պարզաբանվել է, որ զերծ մնան ընտրությունների քարոզարշավին և ընտրական գործընթացներին «խաղեր տալուց», հակառակ դեպքում օրինախախտները կպատժվեն օրենքի ողջ խստությամբ: Երեկվա այս օպերացիայի արդյունքում որոշ «հեղինակություններ» լքել են ոչ միայն Լոռու մարզը, այլ ընդհանրապես՝ Հանրապետության տարածքը: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: