25 հոգուց 8-ն է համաձայնել լուսանկարվել Աշոտյանի հետ․մարդիկ վախեցած են

Մեր կողմնակիցների վրա ճնշումներ են գործադրում, ում, որ ֆիքսում են ՀՀԿ շտաբներում կամ ՀՀԿ թեկնածուների հետ աշխատելիս, նույն օրը կամ հաջորդ օրը սպառնալիքներ են ստանում, հատկապես՝ եթե պետական աշխատողներ են, ՊՈԱԿ-ների աշխատակիցներ: Այս մասին «Առավոտի» հետ զրույցում նշել է ՀՀԿ փոխնախագահ Արմեն Աշոտյանը՝ ընդգծելով, որ մարդիկ վախենում են։ Փաստելու համար, թե մարդիկ ինչքան վախեցած են ՀՀԿ-ի հետ շփումներից, Աշոտյանը մի օրինակ է բերել։ «Ինձ հետ եկել է հանդիպման կամավորների մի խումբ՝ մոտ 25 հոգի մարդ, եզրափակիչ լուսանկարում համաձայնեց ինձ հետ լուսանկարվել ֆեյսբուք գցելու համար 8 հոգի: Մնացածն ասեցին՝ մենք ամեն ինչ կանենք, բայց կներեք, մենք չենք կարող նկարվել ձեզ հետ: Սա՞ է այն Հայաստանը, որի մասին Նիկոլը խոստումներ էր տալիս, սա՞ է իր ժողովրդավարական ընտրությունը: Հանրային հեռուստառադիոընկերությունը bluetooth-ով կպած է Նիկոլի ուղեղին: Մինչեւ ընտրարշավը լրատվական ամբողջ խմբագրական քաղաքականությունն է այդպիսի եղել: Հիմա դրել են հաշվիչ, իբր վայրկյաններով հավասարակշռում են, այն դեպքում, երբ բովանդակության տեսակետից զգացնել են տալիս այն, որ իրենց լրատվականի նախկին ղեկավարը, որը հիմա արձակուրդում է, «Իմ քայլը» դաշինքի մեջ է: Նույնը վերաբերում է շատ ԶԼՄ-ների, որոնց լրագրողները ընդգրկված են այս կամ այն կուսակցության ցանկում, սա՞ է հավասար հնարավորությունը»,-պատմել է նա։