Աջ ղեկով մեքենաների հարցը լուծվեց․ ինչպես ներմուծել և շահագործել դրանք

ՀՀ տրանսպորտի, կապի և տեղեկատվական տեխնոլոգիաների փոխնախարար Բագրատ Բադալյանը այսօր կառավարության նիստին ներկայացրեց գործադիրի «Հայաստանի Հանրապետության կառավարության 2015 թվականի նոյեմբերի 19-ի թիվ 1359-Ն որոշման մեջ լրացում կատարելու մասին» որոշման նախագիծը՝ ՀՀ մաքսային տարածքներում տեղակայված աջակողմյան ղեկային տեղաբաշխմամբ տրանսպորտային միջոցները «Վերամշակում ներքին սպառման համար» մաքսային ընթացակարգով ՀՀ տարածք ներմուծելու համար: Նա նշեց, որ մաքսային ընթացակարգը հնարավորություն կտա աջակողմյան ղեկային համակարգ ունեցող տրանսպորտային միջոցներն առանց վերասարքավորման ներմուծել ՀՀ տարածք, ՀՀ տարածքում մինչև 6 ամսվա ժամկետում իրականացնել աջակողմյան ղեկային համակարգի փոխարինում ձախակողմյան ղեկային համակարգով, այնուհետև ՀՀ օրենսդրությամբ սահմանված կարգով մաքսազերծելուց հետո դրանք հաշվառել ՀՀ ոստիկանությունում և ազատ շահագործել ՀՀ տարածքում: Աջակողմյան ղեկային տեղաբաշխմամբ թեթև մարդատար տրանսպորտային միջոցները «Վերամշակում ներքին սպառման համար» մաքսային ընթացակարգով ՀՀ տարածք ներմուծելու վերջնաժամկետը 2019 թվականի մարտի 1-ն է: ՀՀ առաջին փոխվարչապետի պաշտոնակատար Արարատ Միրզոյանը հստակեցրեց, որ այն մեքենաները որոնք կուտակված են և նրանք, որոնք մինչև մարտի մեկը կհայտնվեն մաքսակետում հնարավորություն կունենան այս մեխանիզմով փոխել ղեկը և շահագործել: «Այն ներմուծողնեը, որոնք մաքսակետում են պարտավորություն ստանձնել են, որ սա վերջին խմբաքանակն է, որ հնարավորություն է տրվում մաքսազերծել», - ասաց փոխնախարարը: Տիգրան Ավինյանն էլ արձագանքեց, որ այս կարգավորումը գործելու է մինչև 2019 թվականի մարտի մեկը և կարևորեց, որ հասրակությունը տեղեկացված լինի, որ արգելքը շարունակելու է գործել դրանից հետո: