ՏԵՍԱՆՅՈՒԹ․ Քոչարյանին ասել են, որ ֆիլմում կլինեն նաև Փաշինյանը և Լևոն Տեր-Պետրոսյանը. Ալումյանը՝ Գործ N1 ֆիլմի մասին

Հայաստանի 2-րդ նախագահ Ռոբերտ Քոչարյանը, որն այժմ կալանքի տակ է, իր փաստաբան Հայկ Ալումյանի միջոցով մանրամասներ է փոխանցել «Գործ N մարտի 1» ֆիլմի, իր հարցազրույցի մասին։ «Սրանից որոշ ժամանակ առաջ պարոն Քոչարյանին զանգահարել է մոսկվայաբնակ մի հայ և ասել է, որ կա հայտնի կինոռեժիսոր՝ Ռոման Բաբայանը, որը ցանկանում է իրենից հարցազրույց վերցնել մարտի 1-ի դեպքերի հետ կապված։ Խնդրել է, որ պարոն Քոչարյանը տա հարցազրույց։ Պարոն Քոչարյանը հարցրել է՝ իսկ իրենից բացի ովքեր են խոսելու, նրան պատասխանել են, որ հարցազրույցներ կտան նաև Նիկոլ Փաշինյանը, Լևոն Տեր-Պետրոսյանը և էլի մի շարք անձինք, որոնք այդ ընթացքում կարևոր դերակատարություն են ունեցել։ Այդ պայմաններում պարոն Քոչարյանը համաձայնել է տալ հարցազրույց, որը կազմակերպվել է մի քանի օր անց։ Այդ ժամանակ էլ տեղեկացել է, որ պարոն Փաշինյանը և պարոն Տեր-Պետրոսյանը չեն ցանկացել հարցազրույց տալ, թեև նրանց առաջարկվել է։ Թե դրանից հետո ֆիլմը ոնց է ստեղծվել, ոնց է մոնտաժվել, ոնց է դրվել շրջանառության մեջ պարոն Քոչարյանին հայտնի չի եղել», - այսօր Վերաքննիչ դատարանում նիստի ընդմիջմանը լրագրողներին Քոչարյանի խոսքերը փոխանցեց փաստաբան Ալումյանը։ Հարցին, թե արդյոք ճիշտ են տարածվող տեղեկությունները, որ Ռոման Բաբայանին խոշոր հոնորար (100 հազար դոլար) է տրվել ֆիլմը պատրաստելու համար, փաստաբանը պատասխանեց. «Բացարձակապես ոչ մի հոնորար Ռոման Բաբայանին չի տրվել պարոն Քոչարյանի կամ նրա մերձավորների կողմից։ Բացարձակապես նրանց կողմից նախաձեռնություն չի եղել։ Հակառակը, մարդ է գցել արանքը, որ կարողանա կապ հաստատել պարոն Քոչարյանի հետ»։ Տեսանյութը՝ Factor. am-ի։