Գազալցակայաններում գազը կգ-ով վաճառելը անտեղյակության արդյունք է. տնտեսագետ

Նոր հարկային օրենսգիրքը դեռևս ուժի մեջ չի մտել, հետևաբար գազի սակագնի ակցիզային հարկի հաշվարկման չափման միավորը խմ-ից կգ-ի անցնելու դրույթը ևս ուժի մեջ չի մտել. այս մասին Tert. am-ի հետ զրույցում ասաց ՀՅԴ ԳՄ անդամ, տնտեսագետ Արմեն Գրիգորյանն՝ անդրադառնալով վարորդների դժգոհություններին, թե գազալցակայաններում գազի համար 40 տոկոս ավելի թանկ են վճարում: «Տնտեսավարողների մի մասը հավանաբար կարծել են, որ ապրիլի մեկից օրենքն արդեն գործում է և անտեղյակությունից ու թյուրիմացությունից ելնելով՝ գազի գինը սկսել են հաշվել կգ-ով»,- ասաց տնտեսագետը: Հիշեցնենք, որ կառավարությունը որոշում էր կայացրել, որ գազը պետք է վաճառվի քաշով, իսկ ակցիզային հարկը պետք է հաշվարկվի ծավալով: ՀՀ վարչապետ Նիկոլ Փաշինյանն էլ հայտարարել էր, որ բազմաթիվ բողոքներ են ստանում մարդկանցից, որ տարբեր գազալցակայաններում գազի ծավալների հետ կապված կան տարբերություններ: Նա նշել էր՝ որպեսզի խնդիրը լուծվի պետք է գազը սպառողին կգ-ով վաճառվի ու հարկային դաշտում հարաբերությունները պետք է կարգավորվեն կգ-ով: Վարչապետը շեշտել էր, որ գազի նկատմամբ ակցիզային հարկի ավելացում չկա։