Իմ և մորս աշխատանքը,խնդրում եմ, իրար հետ մի կապեք․ Վանեցյան

Կառավարության նիստից հետո Ազգային անվտանգության ծառայության պետ Արթուր Վանեցյանը լրագրողների հետ զրույցում անդրադարձել է իր մոր՝ Մարգարիտա Ազարյանի՝ վարչապետի աշխատակազմի Կադրերի վարչության պետի պաշտոնից ազատվելու հարցին։ «Եկե՛ք, այս գործընթացը մի՛ անձնավորեք: Իմ մայրը աշխատել է պետական համակարգում շատ երկար տարիներ, երբ ես անգամ եղել եմ դպրոցական: Նա շարունակել է աշխատել, երբ ես եղել եմ ԱԱԾ տնօրեն: Իմ աշխատանքը և իմ մոր աշխատանքը, խնդրում եմ, իրար հետ մի՛ կապեք, և այդ թեմայով ես այլևս մեկնաբանություն անելու ցանկություն չունեմ»,- ասել է նա: Վանեցյանը նաև անդրադարձել է ՀՀ առողջապահության փոխնախարար Արսեն Դավթյանի դեպքին, նշել է, որ Դավթյանը ձերբակալվել է կաշառք սռանալու պահին, կաշառք տվողին էլ առաջադրվել է մեղադրանք, սակայն հաշվի առնելով նրա առողջական վիճակը և տարիքը՝ կալանքի փոխարեն ընտրվել է ուրիշ խափանման միջոց: ԱԱԾ տնօրենը, անդրադառնալով վարչապետի կողմից ֆեյք օգտատերերի և ապատեղեկատվության դեմ պայքարի վերաբերյալ ստացած հանձնարարականին, ասել է, որ այդ հարցում պետք է շատ զգույշ լինել։ «Ֆեյքերի դեմ պայքարը պետք է լինի շատ զգույշ, մտածված: Եթե գրառումների մեջ չկա հանցակազմ, դա ֆեյք կլինի, թե սովորական անձ, այդտեղ իրավապահ մարմինները որևէ գործունեություն իրականացնելու առիթ չունեն: Եթե գրառման մեջ կա հանցակազմ, ապա ԱԱԾ-ն և իրավապահ մարմինները պարտավոր են իրականացնել համապատասխան միջոցառումներ, որպեսզի բացահայտեն դա»,- ասել է նա: ԱԱԾ տնօրենը նշեց, որ հասարակության մեջ անանուն, ոչ հայտնի օգտատերերի կողմից հրապարակումները կարող են բացասական ազդեցություն ունենալ, սակայն ֆեյքերի դեմ պայքարը չի վնասելու խոսքի ազատության գործընթացին: